مدينة الأوشن بارك (الجزء الأخير)

بعد الأربع أجزاء اللى فاتوا...... اللى اتكلمنا فيهم عن البارك واد ايه هى مليانة بالألعاب والحيوانات والتنوع الرهيب اللى موجود فيها.

 فاضلنا آخر جزء خلاص فى البارك وبكده نكون خلصنا كلام عن أوشن بارك اللى موجودة فى هونج كونج .....اللى من وجهة نظرى من أحلى الحاجات اللى موجودة فى هونج كونج وواحدة من أفضل الحدائق الترفيهية اللى موجودة فى العالم.

أول منطقة هنتكلم عنها هى Polar Adventure ودى منطقة الديزين بتاعها والألعاب اللى فيها كلها معمولة بحيث إنك تحس إنك فى القطب الشمالى وتلج وبطاريق ودنيا تانية.

1.Arctic Blast :  دى عبارة عن كوستر بس فى القطب الشمالى .....من أول المدخل لحد ما تركب اللعبة ....كل حاجة معمولة على شكل تلج وحاجات تحسسك إنك فى القطب الشمالى فعلا!!!

2.South Pole Spectacular : مكان مخصص للحيوانات اللى بتعيش فى القطب الشمالى زى البطريق....مكان جميل جدا عبارة عن بسين كبير والتلج حواليه فى كل حته والبطاريق عماله تتنطط حواليك.

3.Arctic Fox Den : هتشوف التعلب اللى بيعيش فى القطب الشمالى واللى بيتأقلم مع درجات الحرارة دى فى المكان ده .

4.North Pole Encounter : مسرح صغير بيتعمل عليه عرض سريع لبعض الحيوانات اللى فى القطب الشمالى.

 

ثانى منطقة وآخر مكان هنتكلم عنه فى أوشن بارك اللى هو منطقة  Rainforest

ودى منطقة معمولة على شكل غابة كبيرة وكل ديزين المنطقة دى معمول بنفس طريقة الغابات والأشجار الكثيفة.

5.The Rapids : بتركب مركب بيمشى بيك وسط نهر معدى فى قلب الغابة ....لعبة هادية وتنفع للأطفال .

6.Expedition Trail :  بعد ما ركبت المركب ومشيت فى النهر وسط الغابة ...هتخش الغابة نفسها فى المكان ده .....هتحس إنك فعلا فى غابة وهتشوف كمية حيوانات أول مرة تشوفها فى حياتك زى طائر الطوقان و الكينكاجو والكبيبارا ....حيوانات أول مرة هتشوفها فى المكان المبهر ده.

+

7.Ocean Express Summit Station : ودى محطة القطر اللى بتنزل فيها لما بتركب الأوشن اكسبرس اللى كنا اتكلمنا عنه فى الجزء الأول وقلنا إنك ممكن تتنقل بيه جوه البارك هو أو التلفريك.

يا رب تكونوا استفدوا