أرخص فنادق العالم

تقرير مفصل عن الإقامة (الجزء الثانى )...... 

زى ما حاولت فى التقرير الأول إنى أتكلم عن نصائح عموما هتفيد أى حد بيحجز طيران مش شرط هونج كونج بس يعنى.
برضو إن شاء الله هحاول فى التقرير ده أغطى موضوع حجز الإقامة فى أى مكان فى العالم مش هونج كونج بس.

السؤال الأشهر اللى بسمعوا لما حد بيسأل عن أى بلد بيخطط يسافرها ...هى البلد دى الإقامة فيها غالية ولا رخيصة ؟

مفيش حاجة اسمها بلد رخيصة وبلد غالية فى الإقامة عموما ...فى حاجة اسمها انت ناوى تنزل فين ؟ ..يعنى ايه ؟

يعنى والله لو حضرتك بتدور فى هوستل وجست هاوس وفنادق نجمتين فى انضف الاماكن فى العالم هتلاقى حاجات معقولة .
لكن لو بتدور فى فنادق اربع وخمس نجوم أكيد هتبقى غالية ...إذا كان هى أصلا فى مصر غالية مش عارف ليه الناس بستغرب لما تلاقيها بره غاليه ...عشان حضرتك بتدور فى المكان الغلط .

يعنى من الاخر حضرتك ايه متطلباتك من مكان الاقامه غير مكان هتنام فيه وده طبيعى فى بلد اول مره تزورها ..اكيد مش قاطع المسافة دى كلها عشان جى تقعد فى الفندق وتتفرج على فخامته ...لو مسافر كل ده عشان تقعد فى الفندق يبقى انت عندك مشكلة.
ومش معنى كده برضو انك تقعد فى مكان مش نضيف . ...فيه هوستلات و فنادق سعرها قليل برضو بس نضيفه.

خلينا نخش فى الموضوع ...هو السؤال المهم والصح اللى يتسأل احجز من انهى موقع ؟

هو ممكن الفندق الواحد يبقى موجود على كذا موقع بأسعار مختلفة ؟ ايون

 

عشان كده بقى ركز معايا ....فيه حاجة أى حد بيحجز لازم يكون عارفها اللى هىHotel Compare System  

وهعرف منين بقى ارخص سعر للفندق موجود فى انهى موقع ؟هو ده بقى اللى هكلمك عنه..... طيب خلينا نمشى خطوات مع بعض كدا 

 1.مبدئيا كده هخش على موقع معروف زى بوكينج  وهختار بلد الاقامة والتواريخ اللى هكون فيها هناك

2.فيه حاجه على اليمين كدا مهمه أوى وبتوفر بحث كتير أوى وناس كتير مش واخده بالها منها اسمها فيلتر.....دى لازمتها ايه بقى ؟

  دى بقى ممكن اتحكم فى نوع السيرش اللى الموقع هيعملوا زى انى اختار ان الموقع يعمل سيرش مثلا على هوستل بس او هوستل وفنادق نجمتين او ثلاثة وفيه حاجه احلى كمان اسمها Price Range يعنى ممكن تحدد للموقع انت عايز تدور على فنادق بكام فى الليلة وهو على أساس البيانات دى بيبتدى الموقع اوتوماتيك يفلتر السيرش 

4.اختار Lowest Price Firstعشان يرتبهوملك من الارخص للاغلى . 

5.خلصت كده لا لسه دى البدايه بس ...بعد ما حددت الفندق او الهوستل اللى السعر بتاعوا مناسب ليك نرجع تانى لموضوعنا اللى كنا اصلا بنتكلم عنه اللى هو Hotel Compare System فيه كذا موقع بيعمل قصة المقارنة دى زى :hotelcompined وTrivagoوhotelscanner .....هبتدى بقى ادخل اسم الفندق اللى اختارتوا بنفس التواريخ وهعمل سيرش عليه فى المواقع دى ...ايه اللى استفدوا بقى ؟

6.ممكن فندق يبقى نازل على موقع زى agoda او hotelwire بسعر احسن من booking اللى كل الناس بتشتغل عليه وده حصل معايا فعلا فى هونج كونج وحجزت من على agoda عشان كان عامل عرض كويس.

7. وده مهم جدا جدا انك تحط اسم الفندق اللى اختارتوا ده فى موقع اسموا Tripadvisor وتقرأ اراء الناس عن الفندق قبل ما تلبس وتحجزوا ...طيب هقعد أقرأ 7000 رأى ...لأ طبعا ...فيه حاجه اسمها Travel Rating هتلاقى الموقع مرتب اراء الناس حول الفندق ده ...يعنى كام واحد قال كويس وكام قالوا ممتاز وكام قالوا سئ وعامل نسبة بالكلام ده ...شوف النسبة بس اهم حاجة. 

8.فى نفس الموقع ودى أهم حاجة بالنسبة ليا حاجة كدا اسمها Traveler Photo دى مهمة جدا جدا ...ليه بقى ...عشان دى ناس زيي وزيك راحت الفندق ومصورة صور من أرض الواقع لأن أحيانا الفندق بيحط صور حلوة اوى عشان يشدك وتروح تلاقى كلام تانى خالص. 

9. اختيار مكان الفندق بحيث ان الفندق يكون قريب للمواصلات ...طيب ودى هعرفها منين ؟ ...المواقع المحترمة زى بوكينج بتبقى عاملة علامة كده تعرفك اذا كان الفندق ده قريب او لأ من المواصلات العامة هتلاقوها موجودة فى ال Screen Shots .....
ودى بقى لازم تخلى بالك منها اوى عشان ممكن تختار فندق كويس بأسعار رخيصة بس يكون بعيد عن المواصلات فتدفع فلوس انك توصل للمواصلات العامة أصلا أكتر من اللى أنت وفرتها فى حجز الفندق .

انا عملت للكلام اللى قولتوا ده Sceen Shot عشان الناس تعرف بيتعمل ازاى وتستفاد عشان بجد الحاجات اللى قولتها دى بتفرق فى الحجز.
يا رب تكونوا استفدوا.