مدينة الأوشن بارك (الجزء الثالث)

ركبنا التلفريك وعدينا للجزء الثانى من البارك ......ايه اللى موجود فى الجزء ده بقى ؟؟؟؟

تقريبا الأجزاء اللى فاتت مكانش فيها ألعاب خالص .....كان فيه باندا واكواريوم ونافورة راقصة بس الألعاب مكانتش موجودة 

الجزء ده بقى مليان ألعاب وشقلبة وحاجات من اللى ناس كتير مستنياها

أول جزء هيقابلك بعد ما تنزل من التلفريك اللى هو : Marine World ده من أكبر الأجزاء فى البارك ومليان ألعاب كتير أوى.

هو الألعاب مش كلها هكتب عليها كومنتات لأن فيه ألعاب صورتها كفاية إنك تفهم ايه اللى هيحصلك بعد ما تركبها!!!!

1.Ocean Park Tower: الحقيقة دى متعتبرش لعبة ....ده تاور عالى جدا بتركبه وليه شبابيك زجاج بيطلع بيك لإرتفاع عالى جدا يخليك تشوف البارك كلها من فوق وبيطلع وينزل براحة جدا عشان لو الإرتفاع ده كله نزله أو طلعه بسرعة الناس هتموت من الخوف عشان إرتفاعه عالى جدا فعلا....الكابينة الزجاج اللى جوه بتلف 360 درجه برضه ببطء عشان تتفرج على منظر لبارك كلها من فوق وهى فى قلب المحيط ....منظر رهيب.

2.Flying Swing: الكراسى الطائرة .

3. Crazy Galleon: شبه سفينة نوح اللى عندنا فى دريم بارك.

4.The Dragoon: شقلبة السنين .....لا ينصح به لأصحاب القلوب الضعيفة. 

5.Ocean Theater: نفصل شوية من الألعاب ونشوف كام شو كده بيتعمل هناك ....ده عرض للدولفين بس هو الأحلى من العرض مكان المسرح والديزين بتاعه وهم....مصمم بحيث إن كراسى المسرح على شكل مدرجات عالية وانت بتتفرج على العرض إنك تحس ان العرض فى المحيط مش فى حمام السباحة.

6.Pacific Pier: ده شو بيتعمل لكلب البحر ....شو لذيذ برضو

7.The Abyss: زى الصاروخ كده بس أعلى بكتير!!!

8.Eagle: الفناجين الطائرة.

9. Chinese Sturgeon Aquarium: سمكة مهددة بالإنقراض اسمها سمكة الحفش معمولها اكواريوم لوحدها .....بس الاكواريوم اللى جواه السمكة دى الإضاءة بتاعته وشكله وألوانه حاجة ولا أروع.

10.Ferris Wheel

11.Sea Jelly Spectacular: من أجمل الحاجات اللى فى الجزء ده....قنديل البحر المضئ.....عاملين احواض اسطوانية وطافين النور ومسلطين على الحوض إضاءة كدا ألوانها تحفة غير إن النوع ده من القناديل بتشع نور فسفورى كده بيخليك تحس إن فيه سينفونية ألوان بتتعزف فى المكان !!

12.Garden of Joy: حديقة للنباتات اليابانية فيها كام نوع من الأشجار والنباتات النادرة من اليابان.

 

 

13.Shark Mystique: أكواريوم لأسماك القرش بس بكل أنواعها زى : White Shark  Tiger Shark& Hammer Head Shark حتى المدخل معمول على شكل سمكة قرش فاتحة بقها !!!!!

 

 

يا رب تكونوا استفدوا